Pokémon GO 熱潮　全民皆小智

今日，全香港人都幾乎變成了小智。無論係學生哥定打工仔、西裝友定地盤大哥、明星定打雜、公司老闆定逗緊萬令蚊嘅小職員，冇分年齡及職業貴賤，人人都眼不離機、機不離手，為嘅就係要捉小精靈。

成個世界好似得返小精靈，人人都沉迷當中。

揮一下精靈球好簡單，但要遇到小精靈有如撞鬼一樣係講緣份，你永遠都唔會知道下一刻你究竟遇上乜嘢小精靈。

沿住街頭一直往前走，拎住手機嘅人比比皆是，有一刻你會諗路經嘅途人係咪同自己一樣都係捉緊小精靈？而當擦身而過那刻，你可能會偷偷地昅佢係咪玩緊，係嘅話似遇見同伴，而佢哋嘅出現，亦為你本嚟覺得捉小精靈呢個看似好小學雞嘅行為，搵到玩嘅籍口：

超，啲阿叔都係咁玩啦，怕咩瘀！

有人不怕尷尬邊行邊玩，有人直情停低喺轉角位為捉小精靈；佢哋三五成群，神色凝重地對住碌柱，然後食指一揮：「哎呀，咁難捉嘅！」而隔離嗰位友人可能仲搵緊隻小精靈：「我遇唔到嘅喂！」

呢一刻，同事之間多咗交流，平日冇乜出聲嘅同事都可能開金口：「喂，呢個點捉？」「呢到有波音蝠。」「點解我遇唔到嘅？」「點樣拎精靈球？」「哇，你捉到化石恐龍！」就連平日怕曬怕行得遠嘅人，今日都出奇地話：「不如去遠啲食？」，為嘅咪係可以沿途遇上更多小精靈。

其實隻Game冇乜特別，但你唔知點解佢會有種魔力叫人著迷，著迷到連宅男都願意離開屋企半步走上最怕嘅大街，甚至連一啲未必係睇小精靈長大嘅人都玩埋一份，究竟呢份魔力係嚟自潮流趨勢人人都玩？定係嚟自心底裡嗰份「童真」？

唔知，可能一星期後，呢個「小智」熱潮就會退卻，但無可否認，普遍人臉上都因為呢隻遊戲而多咗一份真摯笑容，而呢個笑容，又有幾耐冇喺一啲人臉上出現過？

原文載於Jencfu facebook專頁，文章獲授權轉載。